Langit si Pitu Lampis

Dijadihon marhitehite hatana sambing.Tarida do i antong sian tongo-tonggo ni angka datu,na mandok : 

Daompung Debata natolu , natolu suhu natolu harajaon sian langit napitu tindi,sian ombum napitu lampis ,Sahata saoloan Ho dohot Debata mulamula , Debata Mulajadi,napande manuturi,na malo mangajari.

Asa pitu lampis do langit didok barita ni ompu narobi, jala di ganup lampis ,sada be panjaga dibahen Debata.

A) Langit Parjolo.

     Disi ma inganan ni angka mangulahon na suhar.Ai andorang so adong dope jolma ,nunga diparade Mulajadi hian inganan i.Jadi nasa jolma,molo suhar pambahenanna i saleleng di ngoluna,ingkon pasuharon ni Mulajadi ma,uluna i dompak toru,patna i dompak ginjang.Alai begu ni jolma i do i,dung mate jolma i.i do uhum tu nasida.

B) Langit Paduahon

     Inganan ni angka panangko do disi,Manang aha na tinangko ni jolma andorang di ngoluna ,ingkon tongtong jongjong nasida arian dohot borngin maniopniop na tinangkona be,asa tangkas tarida balga ni hajahatonna be,sian balga ni na tinangkona.Jadi marporsuk ma nasida paboanboan i.

C) Langit Patoluhon

     Nasa jolma siganjang dila hian andorang di ngoluna,disi ma inganan ni beguna(tondina) dung mate.Dung i taiton ni 

Debata ma dilana i, ro di 10 manang 100 dopa,asa saratsarat uju mardalan.I ma uhum tu nasida ,ala ganjang dilana.

D)Langit Paopathon

   Disi ma inganan ni  jolma pangansi dohot panggunturi andorang di ngoluna.jadi masitunggu singirna dohot msigarar utangna be disi arian dohot borngin, mandok: "Ale si anu,garar utangmu tu ahu."Laos songon i muse didok parutangi i,tu parsingiranna be.Asa tung na gaor do disi tongtong.Disi do inganan ni na mate maningkot ,jala tongtong do bahenon ni Debata beguna di beangan bosi ,unang boi meret. i do alana umbahen so boi siar begu ni na mate maningkot.ima uhum tu nasida.

E) Langit Palimahon

     Nasa jolma na olo manumpahi na dangol dohot na pogos andorang di ngoluna ,disi ma ingananna.Jongjong be ma nasida dohot na niurupanna i.Jaloonna be ma marlompitlompit sian Debata ,balos ni na denggan na binahenna.I do umbahen didok halak Batak : " Ia uli sinuan,uli do gotilon,ia duri sinuan ,duri do gotilon!"

F) Langit Paonomhon

     Disuan Mulajadi Nabolon ma disi ,nasa suhatsuhat ni jolma manisia.Ia na denggan suhatsuhatna di banua ginjang ,ba denggan ma jolma nampuna suhatsuhat di banua tonga.Alai molo roa do suhatna i di banua ginjang,ba,roa ma jolma mampuna suhatsuhat i di toding banua tonga.Di na laho tubu jolma tu hasiangan ,jolo di pangidohon do i tu Bataraguru ; ai mangkuling do Bataraguru tu ganup na naeng tubu ,didok do tu angka tondi ni na pogosi : " Ndang gok dope suhatmu! " Alai didok napogosi do : Agia lapalapa ,di atas ni sobuon,agia malapalap ,asal di hangoluan. I do umbahen di umpamahon halak ro do nuaeng : Dolok Martimbang hatubuan ni  horahora , Debata na di ginjang suhatsuhat ni hita jolma.Disi ma dijalo jolma sori gabe manang sori mago.

G)Langit Papituhon

     I ma inganan ni Mulajadi Nabolon ,ai di langit ni langit di ginjang ni ginjangan do i.Tusi ma huhut angka na sangap dohot raja parroha na denggan di bahen Debata.Asa marhite sian parbinotoan ni halak Batak taringot tu turpuk ni tondi ni jolma dung mate ibana do umbahen na jotjot manongos angka sisolhot ni na mate tu na matena. 

Penulis : W.M.Hutagalung, Pustaha Batak,"Tarombo dohot Turi-turian ni Bangso Batak"

Shared by : PARTOBUNA Jakarta Timur 1